Casada con Abrahem aben Bivan. El 13 de noviembre de 1286, suscribieron una carta en la que “Sepan quantos esta carta vieren, commo yo Abrahem aben biuan fijo de Çuleman aben biuan e yo Cety muger deste connonbrado, de mancomun otorgamos e conoscemos que vendemos a vos maestre ferrando Maestrescuela de Cordova unas casas que nos avemos en la collacion de sancta Maria cerca de la puerta de la Juderia, en que ay un palacio o un corral e un pozo. Et han lindado, por enderredor, casas de sancta maria que fue bodega de Mosse dargote, o casas de Lope aznarez fijo de Aznar perez, e casas de Abrahem aben biuan primo de mí el vendedor, e la calle. Et por estos linderos son conoscidas estas casas sobredichas que vos vendemos con entradas e con salidas e con todas sus pertenencias por precio nombrado doszientos maravedis de los dineros alfonsis que el Rey mandó fazer en la guerra. Onde somos nos los vendedores bien pagados; e renunciamos que en ningun tiempo non podamos dezir que non recibiemos de vos estos maravedis; e si lo dixieremos, que non nos vala a nos nin a otri por nos. Et desapoderamosnos de todo el poder que nos en ellas avemos; e apoderamos en todas a vos el comprador commo en vuestras. Et nos amos a dos, marido e muger, de mancomun a voz de uno e cada uno de nos, por todo vos somos fiadores e redradores de todos los omens del mundo, que vos las quieran demandar ó contrallar todas o dellas, que nos redremos con nuestros cuerpos e con nuestros averes e con todo quanto que oy dia avemos e avremos nos e qui lo nuestro heredare. Et de tal manera redremos e vos las fagamos todas sanas, commo vos el comprador e qui lo vuestro heredare finquedes con esta compra sobredicha a todas maneras sin contralla ninguna”.